K i n n e r t i e t

Wenn ick in Schummern sitt alleen,
Dreih ick torüch de Tiet:
As ick noch weer een Göör so kleen,
Wat weer de Welt so wiet.

Ick seet still achter Moders Rock,
Wat kunn mi dor passeern.
Blots vör de grote Bimmelklock,
Dor kunn ick mi verfeern.

Un harr ick Moder argert mol,
Dat geev't niks mit den Stock, -:
"Paß op, glieks kummt se dor hendaal,
De grote Bimmelklock!"

Hör ick hüüt de Klock mol slag'n,
- för mi vertruter Klang -
Denn hör ick stille Mann mi frag'n:
Weets noch, as du weerst bang?